Ivo Murgia

29/08/2007

COSA 'E FAI E BLOG

Incumèntzat custas dis su "Cabudanne de sos poetas" in Sèneghe cun d-unu programa interessanti. Atòbius apitzus de s'arrepentina, sa poesia a ballu, un'arregordu de Frantziscu Màsala, cantus a cuncordu e a cuntratu. Cun Càralu Pillai, Marcu Lutzu, Miali Mossa, Bustianu Pilosu, Franciscu Sedda e atrus.

Innoi totu su programa: Cabudanni de is poetas

In Sant'Anna Arresi su 2 ddui at a essi su film de Arricu Pitzianti "Piccola pesca", unu bellu traballu diaderus chi a mei m'est pràxiu meda e chi si consillu a totus. Po s'ocasioni de su festival de Jazz ddui at essi mùsica "live" a dd'acumpangiai cun Arricardu Pitau a sa trumba, Andria Pisu a is launeddas e a is electroneddas, e ita totu no fait cun is launeddas!, e Màuru Schiavone a su pianu. At a essi bellu de siguru e iat a tocai a ddui andai fintzas ca a Arricardu Pitau no ddi scarescit mai de chistionai su sardu in totu is ocasionis e chi si parit pagu!

Sant'Anna Arresi Jazz

A su chi parit apu sarvau sa vida a una picioca! Su blog de Anna V. at pubricau unu post aundi nàrat ca dd'apu fatu torrai a scoberri is arrexinis suas gràtzias a su traballu miu e a su chi pongu on line. Dd'at fulminada sa bandera mia de is 4 morus chi at biu in sa community de Splinder e de intzandus at obertu is ogus! E sigumenti no ddi pariat bastanti custa decrarada at pensau finas de promotzionai su blog miu in su situ de Ok Notizie. O Anna e ita ti potzu nai? gràtzias fintzas a tui!

Anna V. ; Ok Notizie

Postu de: is4morus a is 10:09 | link | commenti (7)

27/08/2007

CANTADAS E MUTETU

Cantada campidanesa su 1 de cabudanni in Ceraxus cun Zuncheddu de Brucei, Orrù de Sìnnia, Melis de Cuartu e Crisioni de Sa Baronia.

Torra su 1 ma in Sètimu gara cabesusesa cun Zizi e Màsala.
Su mutetu est de Pàulu Mura de Teulada, ndi dd'apu pigau de sa cantada chi ant fatu po sa festa de Sant'Aleni in Sìnnia su 27 de austu de su 2004 cun Vàrgiu de Cuartùciu, Saba de Terreseu, Pani de Cuartu e Mura de Teulada. Contra Pilleri e Pitirra de Sìnnia. At fundau Eliseu Vàrgiu de una besti chi sa mama dònat a is fillus suus; su fini fiat s'arratza.

E notesta tochendi is tastus
no est permìtiu a isballiai
ma chi si usint versus sinzillus
ca aici su versu si intònat
torrendi s'oditòriu sodisfatu
siat cun sa morali o cun su galateu
e si in calencuna erra s'incàpat
gei eis a perdonai mètrica e lei

A mei o Eliseu mi dònat a pensai
chi apat fatu fillus e fillastus

Postu de: is4morus a is 17:03 | link | commenti (3)

20/08/2007

CANTADA E CANTZONI

Su 25 in Ceraxus cantada campidanesa cun Zuncheddu de Brucei, Orrù de Sìnnia, Melis de Cuartu e Marras de Cuartu; contra Cogoni e Valdes de Cuartu.

Una cantzoni a curba (senàriu dòpiu) chi apu postu po unu studianti chi at trumentau meda po lompi a sa làurea, a s'acabada nci dda fait ma no ddi scarescint totu is tribulias chi at dèpiu passai. Ocannu at partetzipau a su cuncursu literàriu de Silius-Santa Bràbara aundi at bintu sa setzioni de is cantzonis a curba cun d-una mentzioni speciali de sa giuria.

SU LAUREAU

E ge m’est costada s’universidadi
Una cosa aici no mi dda creemu
Intru giovuneddu ndi bessu in edadi
Finas sa saludi arrischendi femu
Sa scola sighemu in s’aposenteddu
De laurea capeddu bolemu bistiri
Po ndi podi essiri a fama ‘e dotori!

Po dotori essiri pesam’a ora ‘e pudda
Càntat su caboni luegu a fai faina
A issa ses bisendi su letu aprapudda(s)
Ma a solu t’agatas pensendi a bixina
Po indulli sa schina calau m’esti guta
Sa gana mia arruta maladitu ‘e bancu
No seu bellu mancu po fastigiadori!

Finas su fastìgiu mi depu privai
Po mori ‘e sa làurea tanti disigiada
Totu cudda scèntzia po depi imparai
A costu ‘e portai sa conca segada
Ca dd’apu acabada cumenti a Leopardi
Grassu che una mardi po mi movi pagu
Lassu su divagu a mod‘e arretori!

Peus de un’arretori scola ita m’as fatu
A scuriu incrubau tropu tempus sètziu
Bivendi incotiu logu pagu adatu
Su corpus guastau custu esti su prètziu
Calincunu scrètziu sendi sempri a solu
Chentza de consolu tristu e afrigiu
Bèciu, bagadiu in circa ‘e s’amori!

No sceti s’amori sa personi mia
strupiada aici po su chi bolemu
Aciapada dd’apu lègia maladia
No càstiu su sprigu sino’ timu e tremu
Sa faci tenemu totu sbisurada
Schina atrotiada, tzurpu e tzumburudu
Apaliau corrudu mama mia ‘ta arrori!

Postu de: is4morus a is 11:40 | link | commenti (21)

13/08/2007

CANTADAS E SIMONA SALIS

Su 14 in Ùssana cantada campidanesa cun Pani de Cuartu, Saba de Terreseu, Vàrgiu de Cuartùciu e Mura de Teulada. In Orgòsulu cantadoris cabesusesus cun Mureddu, Màsala e Farina e su 16 improvisadoris tuscanus in "ottava rima" cun Màuru Chechi e David Riondino. Su 17 "sa scuadra de Pani" est in Ceraxus. Su 18 in Sa Baronia (Bidda Perùciu) campidanesus cun Zuncheddu de Brucei, Orrù de Sìnnia, Melis de Cuartu e Crisioni de Sa Baronia. Su 19 in Siurgus gara cabesusesa cun Porcu.

Simona Salis at a cantai su 19 in Frùmini de Cuartu, in sa pratza de Sant'Andria. Sa di' prima est in Montresta (NÙ). Unu bellu cuntzertu de "etno-jazz" in sardu. Consillau. Sa sceda est in su "myspace" de issa: Simona Salis

Postu de: is4morus a is 15:29 | link | commenti (1)

08/08/2007

DE INTERNET

Gira ca ti giru apu agatau custus situs bellixeddus.

Su Nuraxi de Barùmini, patrimòniu de s'umanidadi de s'Unesco, presentau in sardu.

Su Nuraxi

Su blog de sa trasmissioni de Radio Onde Furlane. Unu blog chi est unu esempru bellu de manixu modernu e professionali de una lìngua de minoria.

Internazionalitari

Su film nou de Sabina Guzzanti. Dd'at girau giai totu in Sardìnnia cun paricis atoris sardus e at a andai a su festival de Venètzia. Tra is prus connotus ddui est finas Pierfrancesco Loche.

Le ragioni dell'aragosta

Su campionau sardu de sa murra e s'atòbiu internatzionali de is murradoris de su mediterràniu. In Ortzullè su 11 de austu, in pratza Funtana Bècia de is 5 e mesu.

Sa murra

Su discu e su vìdiu nou de is "Balentia". Su discu est "Bisendi disi" e su vìdiu "Catz'e sonu", chi ant girau in Bia Roma in Casteddu. Is Balentia funt intra is mellus rappers in sardu, po cuddas arrexonis chi eus giai nau, ca tenint connoscèntzia e cuscièntzia de su connotu ma bivint in s'arrialidadi de oi, faendi cosa de oi cun capassidadi e idea bona, intamus de stroci sa cosa allena chentza de pensai. Po sorti manna nosta no funt a solus, antzis a dda contai giusta, sa cambarada de su rap, reggae etc. in sardu si fait prus e prus manna: Malos Cantores, Dr Drer & Crc Posse, Reverendo Jones, Ratapignata, GanaSana, Funtana Gang, Stranos Elementos, Menhir etc. Su fenòmenu abisòngiat a ddu castiai cun interèssiu, ca est curioseddu, e dd'at documentau beni Marcu Lutzu in su documentàriu suu "Su Raap - L'hip hop in Sardegna".

Catz'e sonu

Postu de: is4morus a is 12:08 | link | commenti (5)

06/08/2007

CANTADAS E FÈRIAS

Is cantadas de custa cida, is chi sciu deu assumancu. Oi in Gèsturi cabesusesus cun Porcu de Irgoli e s'atru no ddu scieus.
Su 7 in Cortoghiana cantada campidanesa ma no scieus is cantadoris, sempri po mori ca in is programas de is festas no nci ddus ponint. Su 9 in Scroca cantada cabesusesa cun Porcu. Torra su 9 in Pauli po Santu Larentzu cantada campidanesa cun Tzedda, Filia, Orrù, totus de Sìnnia e Marras de Cuartu. S'11 in Terreseu, Saba de Terreseu, Falqui de Arriu 'e Murtas, Pani de Cuartu e Vàrgiu de Cuartùciu. Su 12 in Scalebranu cabesuseus cun Porcu, Màsala e Agus. Tenei passièntzia po custas scedas totu a arrogus e a mùssius ma de prus no at fatu a fai.

Giai chi seus in s'istadi forti e sa fatiga po scriri su post de Santu Sparau est stètia tropu manna, de imoi a innantis su blog at a caminai prus a bellu ca mi ndi andu in fèrias deu puru ca gei mi minescit. Eus a sighiri sinnalendi cantadas e atra cosa de fai o calincunu lìburu o discu.

"Stay tuned" e no si nci stesieis tropu ca seus preparendi sa "campagna d'autunno" cun novidadis, scedas noas, scàmbius curturalis, pubricatzionis, prèmius, cumbidus, bobois, guetus e atra cosa ancora!

Postu de: is4morus a is 11:28 | link | commenti

01/08/2007

ESPERIMENTU IN SANTU SPARAU

Iat a essi stètiu bellu a ddu intitulai custu post "traditzioni in transitzioni" ma dd'at giai fatu Entzu Favata e intzandus ddu podeus sceti arremonai de issu. E aici etotu feus. Poita su "esperimentu" de giòbia passada in Santu Sparau, aintru de sa manifestada "Cuncàmbias", custu fut. It'est sutzèdiu. Su talentu nou de s'otada logudoresa Giusepi Porcu de Irgoli acumpangiau de su tenori de Orgòsulu at cantau paris a Alessi Mura "Su Maistu," de is "Balentia", chi no est unu cantadori a otadas ma unu "rapper" a sa moda americana chi càntat in campidanesu. A su tenori orgolesu Alessi dd'at arrespustu cun d-unu dee-jay e is basis suas arregistradas.
Poita m'est pràxiu custu atòbiu. Po medas arrexonis. Poita no seu tropu purista, sceti candu serbit, e m'agradessit sa sperimentatzioni. Prus de totu candu est beni fata e de sa manera giusta, cun cudda "forma mentis" chi bolit nai cuscièntzia de su connotu e cuscièntzia de sa modernidadi, gana de ghetai manu a sa traditzioni po dda fai sighiri a bivi in su mundu de oi, chentza de dda strupiai, chi fait.
Giusepi Porcu at fatu su chi fait sèmpiri, at cantau a otadas e Alessi Manca at provau a dd'arrespundi in "free style". Est stètiu issu a fai su sfortzu prus mannu, a fai su passu po si depi acostai a su linguatzu de s'otada e custu tòcat a si dd'arreconnosci. Sa cosa est ca pròpiu su linguatzu est tropu diversu, e s'intrìciu no nd'est bessiu a pillu craru craru.
Fortzis, sa cantada boliat studiada unu pagheddu mellus, faendi cunfrontai su "rap" cun s'arrepentina, chi s'assimbìllant de prus o mancai donendi unu tema a is duus cantadoris. Certu ca imoi, send'essi sètziu ananti de su computer est totu fàcili, e a pensai ita iat a essi tocau a fai s'est tropu discantzosu. Ma su merescimentu de custa pensada bella est totu de is chi ant apariciau sa cosa. Po totu is atrus, cantadoris e pùbricu, un'esperièntzia bona chi podit oberri una caminera, calisisiat.
Un'atra borta Pàulu Tzedda, su cantadori a mutetus, in Igrèsias iat cantau a otadas cun d-unu cantadori cabesusesu, Scano de Utzieri, issu in campidanesu e s'atru in logudoresu, ma custa borta s'esperimentu est prus atriviu puru. Un'atrivimentu perou chi nci dexit o assumancu chi a mei mi praxit, torrendi a nai. Cumenti mi praxint is electroneddas de Franciscu Capuzzi o su tenori "San Gavino" de Oniferi chi at fatu cantai po sa primu borta in d-unu discu ("E Prite tottu custu"), is mutos a una fèmina, a Aleni Ledda.
Custu poita pensu chi is meris de sa traditzioni siaus nosu etotu e chi amarolla dda depaus morigai, pigai in manus po dda cambiai, amelliorai, agiornai, adatai. Su connotu camìnat e intzandus mellus a ddu ghiai nosu custu caminu chi no a ddu lassai andai a scèscias, chi teneus cudda cuscièntzia chi fia nendi e chi si fait movi intra arrispetu e obertura.
Una borta Cicitu Màsala, candu dd'emu intervistau po "Sa Republica Sarda", mi iat nau ca issu fiat indipendentista poita fiat crosidadosu de biri ita c... nci arrennesciant a fai is Sardus chi fiant a solus. Deu femu e seu de acòrdiu cun issu, e finas in su connotu seu crosidadosu de biri ita nd'eus a fai nosu Sardus de totu custa sienda chi s'ant lassau ajajus nostus e chi portaus in manus e chi no est pròpiu cosa de nci depi bolai. A mei custu disafiu mi infògat e mancai sia biendi cosa chi mi fait frunziri is murrus, seu biendi puru cosa chi mi cumbincit e mi fait sperai in bonu. Apu a essi stròllicu deu, ma a moda mia ddis tengu fidùcia a is Sardus.
Iscurtai, prexaisindi e giudicai bosatrus etotu. M'est doveri a torrai gràtzias a s'amigu Antoni 'Esì po su file àudiu e po atrus prexeris e fintzas po sa cumpangia chi mi fait, e si feus apari, girendi sa Sardìnnia po biri, connosci, chistionai, scrucullai totu su chi acudeus a fai.

Su meri de domu

Cumentus

Fotografias

Amigus

Mesis

Genias

Funt agiudendi

Feeds

Contadori