Lìngua e cultura sarda

SONUS E VERSUS


De su progetu de su cumunu de Siurgus Donigala e de Marcu Lutzu, chi iant apariciau ocannu passau, fait a agatai on line totu is arregistratzioni chi iat fatu Marcu Lutzu etotu in sa bidda campidanesa. Unu scraxoxu de cantus, ma iat a essi mellus a nai de sonus e versus, de paricis cantadoris e formas mètricas, anninnias, mutetus, cantzonis a curba, atìtidus, gòcius, duru duru, serra serra, arrosàrius e ancora sonadas a fisarmònica de Fiorentinu Piras etc. etc. Una bella arregorta chi totus si podint gosai, abàstat sceti a bandai a su situ de su cumunu e a s'ascurtai custu patrimòniu.
Sonus e Versus
In su interis de un'atru giassu, "Il Sardo", ponint marrania a is cantadoris "virtualis". Su meri de su logu at postu unu mutetu on line i est abetendi a dd'arrespundi "a corpus de mutetus". No iat a essi sa primu cantada on line, ma a chini si dda intendit podit provai a nci ghetai su mutetu cosa sua.
Il Sardo
Po su chi est cantu in palcu, labai ca notesta faci a is 9 oras faint una cantada in Donori po Santu Giorgi cun is cantadoris Tzedda de Sìnnia, Zuncheddu de Brucei, Melis de Cuartu e Orrù de Sìnnia.
E intzandus po no essi prus pagu cosa de is atrus, nci pongu unu mutetu deu puru, mancai no siat su miu. Ndi ddu seu pighendi de una gara chi iant fatu in Cuartu in su 83 cun Broi de Igrèsias, Saba de Terreseu (Narcau), Urru de Brucei e Pani de Cuartu, su bàsciu e contra est de Sètimu. Su mutetu est de Giuanni Broi chi a s'ora fiat acabendi sa carriera sua; est chistionendi de Bitiredda Melis una cantadora famada.

Apoi de tanti fàulas e iscrètzius
sa stòria at bòfiu a precisai
e su nòmini nc'at bòfiu incrudi
de Maria Itria Melis atesti
Nàscia in Ceraxus po beridadi
e poi a Cuartùciu si traspòrtat
po podi fama Bitiredda abundi
e morri a annus sessantaduus

Su prus chi impòrtat est a nc'aturai
aundi ddus at sa virtudi sètzius

Postu de: is4morus a is 11:12 | link | commenti (5)

Commenti

#1   28 Aprile 2007 - 13:17

 

o Ivo, la chi po sciri is dis de is cantadas seu castiendi su blog cosa tua, no ti scarescis!
Sa primu ti dda ghetu deu: su 5 de maju nci nd'at a essi una a Pauli

utente anonimo

#2   29 Aprile 2007 - 10:41

 

Eijei, imoi incumentzaus a ndi ponni, sa de Pauli dda sciemu giai ma gràtzias a su pròpiu!

is4morus

#3   29 Aprile 2007 - 11:10

 

bellu traballu ant fatu in Sriugus! E bellu a ddu ponni in s'arretza

aici totus

Marcu

utente anonimo

#4   03 Maggio 2007 - 09:30

 

Là ca sa versada de "Il Sardo" est inghitzada, benei a poetai!

utente anonimo

#5   13 Maggio 2007 - 07:21

 

Ciao
mi fa piacere ritrovare un SARDO
Vivi in Sardegna?
ho sfogliato con curiosità le tue pagine
e sono contenta che i segni sardi volino ovunque
La Sardegna è UNICA
a risentirci

betty52

Commenti