Lìngua e cultura sarda

ARRELATA DE CUARTÙCIU


Custa est un'arrelata de su cumbènniu de Cuartùciu chi at stèrriu Màssimu Madrigale.


Sardu e standard: arrexonus e parrimentus in Cuartuçu


Sàbudu passau, su 15 de martzu in Cuartuçu, s’est kistionau de lìngua sarda. S’aposentu de is atòbius de su Cunsillu comunali fiat prenu prenu, ca nci fiant assumancus duxentus personis, jòvunus e beçus sètzius a ascurtai is arrelatus de Luciano Marroccu (Assessori a sa Curtura de sa Provìntzia de Casteddu), Francesco Casula (scriidori), Eduardo Blasco Ferrer (Professori de Linguìstiga sarda me in sa Facurtadi de Scèntzias de sa Formadura de s’Unibersidadi de is Studius de Casteddu), Francu Pilloni (scriidori) e Juliu Solinas (meigu e scriidori). Porru e Lèpori no ant pigau parti a s’atòbiu. Po sa primu borta is ki funt po sa LSC si funt atobiaus cun is ki funt contras po arrexonai impari de polìtiga linguìstiga e de standard.
Luciano Marroccu at cumentzau a kistionai narendi ca tòcat a sighiri a fueddai in sardu po no fai sparessi sa lìngua nosta. At arregordau a Casula ki sa literadura sarda no est sceti in logudoresu (e duncas tòcat a difendi totu su sardu). Pustis Marroccu at acrarau sa posidura sua a suba de sa kistioni de su standard arregordendi a totus ki no dd’est praxu su decretu de sa Junta Soru a suba de sa LSC, ca no serbit, a parri cosa sua, a imponni un lìngua cun d-unu decretu.
Pustis a sighiu a kistionai Frantziscu Casula ki at fueddau sceti in sardu. Casula at nau ca no fait a stesiai su studiu e s’imparu de sa lìngua sarda de sa stòria e de is traditzionis de s’Isula. At arregordau a totus comenti is Savoyas ant circau de burrai s’imperu de su sardu e in su matessi tempus de comenti, assumancus fintzas a su ’77, nci fiat ancora kini, me in sa scola, no boliat s’imparu de sa lìngua sarda (ma oindì puru, mancai is leis, ddoi at kini est contras a sa lìngua sarda). Sighendi a nai ki campidanesus e logudoresus si cumprendint a pari e ki, de sa circa de sa R.A.S., su 68% de is sardus cumprendint e fuèddant assumancus una bariedadi de su sardu, at imperau is fueddus de Tullio de Mauro po nai ki is diferentzias a-intru de una lìngua funt sienda e scusorju de s’identidadi de unu populu. Duncas at acabau narendi ki tòcat a fueddai in sardu de dònnia e calisisiat argumentu (e a fueddai in sardu in dònnia logu).
Prof. Ferrer at bòfiu intrai me in sa kistioni de su standard, arregordendi su ki ant nau Gramsci [“La storia della lingua é storia delle innovazioni linguistiche, ma queste innovazioni non sono individuali (come avviene nell’arte), ma sono d’un’intera comunità sociale che ha innovato la sua cultura, che ha “progredito” storicamente] e Nencioni (“Le lingue naturali non sono né strumenti né codici: sono testimonianza e voce dell’identità etnica, storica e culturale di un popolo e dell’identità personale del singolo cittadino).
Ferrer at arregordau ki dònnia lìngua est filla de sa stòria de unu populu e duncas ki dònnia protzessu de normalizadura est unu protzessu ki pertocat fintzas sa literadura e sa polìtiga de unu populu, acrarendi perou, ki dònnia normalizadura iat a depi cumentzai de una bariedadi naturali (comenti est sutzediu in atrus logus de s’Europa). Difatis, po su sardu, Wagner in su 1928 iat amostau a sa Comunidadi scentìfiga intranatzionali is diferentzias intra de su logudoresu e su campidanesu (po es.: chentu/centu, limba/lìngua e aici nendi).
Contendi sa stòria de is esperimentus de normalizadura de sa lìngua sarda, Ferrer at arregordau ki sa LSU fiat unu logudoresu “naturali” stesiau de is protzessus stòrigus de sa lìngua. A sighiri, at acrarau ki sa "limba de mesania" est un’imbentu, poita no ddoi at uniformidadi me in is làcanas. Oindì puru sa R.A.S., a parri de su professori catalanu, sighit unu tretu sballiau, ca sa LSC est artifitziali. Po Ferrer no fait a imperai sa LSC me in sa scola e in s’aministradura: est una limba kentza de benidori. Duncas po Ferrer tòcat a torrai luegus a su connotu, est a nai a sa lìngua L1 (o lìngua de bartzolu).
Is ùrtimus duus interbentus fiant de Francu Pilloni e de Juliu Solinas. Pilloni, ki iat jai pigau parti a s’atòbiu-dibatu de Masuddas, at torrau a nai ca is diferentzias a-intru de su sardu funt una sienda manna. Solinas at nau de essi de acordiu cun Ferrer ca fintzas po issu puru tòcat a difendi is bariedadis naturalis de su sardu.

Màssimu Madrigale

Postu de: is4morus a is 10:21 | link | commenti (5)

Commenti

#1   18 Marzo 2008 - 17:08

 

De s'inviau nostu in Cuartùciu Màssimo Madrigale...peccau ca non ddui seu pòtzia andai ma gei m'apu lìgiu s'articuleddu! A si bì
V.

PurpleSky

#2   19 Marzo 2008 - 07:55

 

oh ,gentili e forti cantori
di tanta amata terra,
or che di Soru caduta
e' tassa immobiliare
con voi m'unisco
nel solfeggio, sempre
che non siate come
lui stretti di fisco,
e a riproporla quei
un voglia riprovare...

utente anonimo

#3   19 Marzo 2008 - 11:14

 

Oh, utenti anònimu !

A fai polìtiga bai in atru logu, ca innoi si fait curtura e custu NO est unu blog pro o contras de Soru (ki comuncas at fatu prus de sa dereta italiana). Cumprendiu as ?
Ah, e duncas ki nci ses, fai un'atra cosa puru: impera sa lìngua sarda ki nç'arrennescis (sinunca as sballiau blog, poita iast a depi scriri in d-unu blog de lìngua italiana). Càstia ki innoi no seus arrexonendi de afoghijus a suba de s'arrikesa ma de LINGUA e CURTURA SARDA

Cun amigàntzia !

utente anonimo

#4   19 Marzo 2008 - 12:38

 

ARRELATA DE CUARTÙCIU

[..] Custa est un'arrelata de su cumbènniu de Cuartùciu chi at stèrriu Màssimu Madrigale.Sardu e standard: arrexonus e parrimentus in CuartuçuSàbudu passau, su 15 de martzu in Cuartuçu, s’est kistionau [..]

francosardo

#5   19 Marzo 2008 - 13:40

 

amicizia da
sempre coltivo
con genti di
Icnusa,
e per quella
istessa
che scrivo...

saluto e per
l'intrusion mi scuso,
or più non di matton
si parli, ma
sol d'amigàntzia
e.. aulivo

a si biri

Mat

utente anonimo

Commenti