Lìngua e cultura sarda

“SU ZURAMENTU” DE MÀRIU PUDDU

A s'acabu de is annus 70 e a is primus de is annus 80 Màriu Puddu fiat incumentzendi a traballai cumenti e professori in sa scola mèdia de Sant'Uanni Suèrgiu. Pròpiu in cussus annus sa scola sua est stètia protagunista de unu scàndulu. S'arrexoni de cussu scàndulu fut issu etotu. Difatis su Prof. Màriu Puddu si fiat arrefudau de fai "su zuramentu" a sa Repùbrica Italiana. Piticu s'atrivimentu! A su prèsidi e a su "provedidori" ddis fiat pigau a pamporis e luegus iant fatu tzerriai a su professori "traitori de sa pàtria" po depi arrangiai cussa farta. Ma sa parti bella cumìntzat innoi poita cussu professoreddu fiat, i est, tostorrudu diaderus e dda bolit sighiri cun custa idea sua macoca de no giurai pròpiu nudda. Sa cosa sàrtiat is làcanas de sa scola i arrìbat a is giornalis continentalis, ita bregùngia lègia!, unu professori de sa scola italiana chi s'atrivit a nai "Deu seu sardu no seu italianu, giurada no ndi fatzu!". E intzandus su prèsidi tòrrat a tzerriai a cussu professori machillotu ma cuddu nudda, no ndi bolit intendi e aici sighit su tira e molla. Sa nova incumèntzat a girai e a domu de su professori chi chistiònat su sardu in scola e fait ligi is cumèdias in sardu a is piciocheddus, arrìbant is lìteras de solidariedadi de medas disterraus sardus, de su grandu cumediògrafu campidanesu Sarbadoràngiulu Spanu, de sa "Union Valdotaine" e finas is lìteras atzicadas de is sòlitus tzeracus sardus àutu-colonizaus po dd'ofendi e po ddi nai ca est unu macu, sa bregùngia de is sardus etc. Ma sa batalla àndat a innantis cun lìteras, tzerriadas, avolotus in famìllia, pensamentus malus e finas sa timoria de nci perdi su postu 'e traballu. A s'acabada perou s'idea est prus forti de totu su burdellu e de cussa giurada no si ndi fait prus nudda e su Professori tostorrudu che unu sardu podit sighiri a traballai chentza de depi incrubai sa conca a una lei bècia e foras de su tempus. Totu custa stòria, cun documentus originalis, lìteras e cunsiderus personalis puru bessit oi in unu libureddu cuncordau de s'autori etotu aundi tòrrat a contai totu custu contu, po ddu fai connosci a is prus giòvunus e po no si ndi scaresci de una batalledda chi po pitica chi siat, est stètia un'atru matoni postu po ndi torrai a pesai s'identidadi nosta giai de tropu tempus mesu sderruta.

Postu de: is4morus a is 16:18 | link | commenti (2)

Commenti

#1   31 Maggio 2006 - 21:46

 

Apu lìgiu cussu libureddu anca Puddu còntat custus acadessimentus... Seu abarrau spantau de sa dinnidadi e sa fortza de cust'omini chi contras a totus, aintru e foras de 'omu, arrischendi de nci perdi finas su logu de traballu, no at arrinuntziau a is principius suus. Ananti de totu sa dinnidadi.

marco pisano

utente anonimo

#2   01 Giugno 2006 - 10:44

 

as nau pròpiu beni marcu.

is4morus

Commenti